Rueun

liug da scola

Las scolaras ed ils scolars dil scalem superiur Rueun han il privilegi d’astgar passentar lur temps da scola en in dils pli novs baghetgs da scola. La halla da gimnastica, la cuschina da scola sco era il local per il zambergiar textil sesanflan perencunter el baghetg plurivalent a Rueun.

Cun ils 01.01.2018 han las vischnauncas da Vuorz ed Andiast fusiunau cun la vischnaunca Breil/Brigels. Ils 12 da settember 2018 ha il parlament Ilanz/Glion decidiu da serrar il scalem superiur a Rueun. Naven digl onn da scola 2019/20 vegnan las scolaras ed ils scolars da Pigniu, Siat e Rueun integrai en il scalem superiur a Glion. Las scolaras ed ils scolars da Vuorz ed Andiast vegnan integrai el scalem superiur dalla scola Breil/Brigels. 

 

 

historia

Tochen avon entgins onns succedeva ton l’instrucziun sin il scalem primar sco sin il scalem superiur en differents loghens. El contuorn da Rueun havevan las vischnauncas da Siat, Andiast e Vuorz ina partiziun superiura. Ils scolars dalla vischnaunca da Siat ein stai ils emprems che han passentau il temps da scola sin il scalem superiur a Rueun. El decuors dils onns ein ils scolars d’Andiast e Vuorz vegni vidlunder.

 

Avon la fusiun vegnevan ils fatgs da scola dallas vischnauncas Rueun, Siat, Pigniu, Andiast e Vuorz reglai entras ina corporaziun da scola. Quella corporaziun vegneva menada entras in cussegl da scola che secumponeva da representants da tut las vischnauncas partizipadas.

 

La diminuaziun dil diember da scolars ha era ina gronda influenza sin il liug da scola Rueun. La partiziun dil scalem superiur a Rueun vegn menada el model B.

 

 

classas

Ord motivs dalla protecziun da datas desistin nus da publicar las fotografias da classa.

Uraris

Cun in klick sin la classa giavischada contonschis Vus mintgamai igl urari elegiu.

1. reala

1. sec.

2. reala

2. sec.

3. reala

3. sec.

team scalem superiur
Hosang Laurin
scolast da classa
Sgier Fabian
scolast da classa
Tuor Gion Gieri
scolast da classa
Schnoz-Flury Manuela
scolasta dil fatg
Cadalbert Manuela
scolasta da lavurs manualas
Simonet Esther
scola da cuschinar
Qualitad da scola
VALETAZIUN E PROMOZIUN 2015 - 2019 (INSPECTORAT DA SCOLA)

 

Clima/cultura da scola

Il clima da scola a Rueun ei buns. Ils cumpigliai sesentan bein ed ein cuntents cun la scola.

Las scolaras ed ils scolars van bugen a scola ed indicheschan da vegnir tractai gestamein e curteseivlamein. Quellas indicaziuns vegnan confirmadas entras las datas dalla retscherca tier ils geniturs e tier las persunas d'instrucziun. Cun excepziun d'in tschunavel dils geniturs ein ils pertuccai cuntents cun la scola.

Nus constatein che las persunas d’instrucziun instrueschan fetg bugen, ch'ellas sesentan bein e ch'ellas ein cuntentas cun las cundiziuns da lavur. La cuminonza da scola vegn tgirada independentamein en las duas casas da scola, denton per cuntentientscha dils pertuccai.

Sil camp pedagogic vegnan problems actuals sligiai a moda nuncumplicada e speditiva. Ellas sesidas vegn dau memia pauca peisa al discuors pedagogic per promover e reflectar l'instrucziun communablamein.

Il futur incert dil scalem superiur engreviescha il clima da scola ed absorbescha dabia energia.

Las localitads d'emprender ordeifer las stanzas da scola satisfan mo per part als basegns dall’instrucziun.

 

Instruir/Emprender: Direcziun dalla classa

Nus giudichein la direcziun dalla classa alla scola da Rueun sco buna entochen fetg buna.

Las persunas d’instrucziun meinan bein lur classas e procuran che las reglas da convivenza vegnan respectadas. Ei dat cunvegnas ligiontas per il secuntener en scola e l'instrucziun sespleiga senza disturbis. La gronda maioritad dils geniturs sco era las scolaras ed ils scolars sutlingeschan quei giudicament entras lur opiniun pertuccont il mintgadi en scola.
Ellas lecziuns visitadas ei il temps d’instrucziun vegnius nezegiaus bein per emprender e promover las scolaras ed ils scolars. La punctualitad all'entschatta dall'instrucziun ei buca adina avon maun tier tut las persunas d'instrucziun.

 

Instruir/Emprender: Clima d'instrucziun

La buna relaziun vicendeivla denter las persunas d'instrucziun e las scolaras ed ils scolars ei il fundament per il bien clima d'instrucziun. Ei regia ina buna atmosfera d’emprender.

Las persunas d'instrucziun e las scolaras ed ils scolars van entuorn a moda curteseivla in cun l'auter. Las persunas d'instrucziun procuran ch'ei sappi vegnir luvrau senza tema e cun concentraziun. Ils resultats dalla retscherca tier las scolaras ed ils scolars sco era tier ils geniturs cumprovan quella constataziun.
Nossas observaziuns muossan ch’ei vegn nezegiau sbagls a moda constructiva. Negin vegn blamaus ell’instrucziun, sch’el ni ella fa enzatgei falliu.

 

Instruir/Emprender: Structuras/Evidenza

L’instrucziun ella scola da Rueun ei structurada bein. Las incaricas ein claras e capeivlas. L’orientaziun e l’examinaziun dallas finamiras ein meins sviluppadas.

Las lecziuns visitadas ein stadas ritmisadas e structuradas bein. Per gronda part ei il fil tgietschen ella planisaziun staus vesibels e las activitads, ils cuntegns e las fuormas socialas ein s'accordadas bein. Ils resuns da scolaras e scolars sco era dils geniturs cumprovan quei giudicament. Las persunas d’instrucziun e las scolaras ed ils scolars setegnan bein vid il lungatg d’instrucziun.

Las persunas d’instrucziun persequiteschan per gronda part claras finamiras ell’instrucziun. Quellas vegnan mo per part fatgas transparentas allas scolaras ed als scolars. La retrospectiva sin las finamiras e lur examinaziun han muncau per part.

 

Instruir/Emprender: Activaziun cognitiva

La pratica dall’activaziun cognitiva alla scola da Rueun giudichein nus sco suonda:

Las scolaras ed ils scolars separticipeschan bein all’instrucziun. Las incaricas e las fasas per exercitar e consolidar la materia ell’instrucziun ein sviluppadas bein e da buna qualitad.

Il feedback arisguard il process d'emprender e la reflexiun d’emprender ein buca sviluppai bein e succedan meins frequentamein ell’instrucziun.

Las scolaras ed ils scolars ein separticipai bein ed han luvrau a moda concentrada ell’instrucziun visitada. Igl emprender en atgna responsabladad vegn sustenius entras incaricas aviartas che possibiliteschan allas scolaras ed als scolars da suandar lur agens fastitgs d’emprender en lur agen tempo. L’organisaziun dallas activitads garantescha avunda temps per exercitar e consolidar la materia.
Il feedback dallas persunas d’instrucziun sedrezza savens alla realisaziun dil pensum e dat allas scolaras ed als scolars clars avis correctivs. Feedback arisguard il process d’emprender e feedback dils scolars e dallas scolaras drizzaus alla persuna d’instrucziun vegnan praticai pli pauc ella scola.

Nus renconuschin che ina gronda maioritad dils geniturs attesta alla scola che lur affon empren bia ell’instrucziun e che la scola tracta temas interessants.

 

Instruir/Emprender: Pratica cun heterogenitad

La promoziun speciala dallas scolaras e dils scolars cun basegns specials e la collaboraziun denter la persuna d’instrucziun da classa e la pedagoga curativa ein sviluppadas bein ella scola da Rueun. La differenziaziun ell’instrucziun ed il diever dallas fuormas cooperativas varieschan fetg ellas lecziuns visitadas. En general dat ei basegns d’agir en quei connex.

Ell’instrucziun visitada ei vegniu teniu bein quen dils basegns da scolaras e scolars cun basegns specials e la collaboraziun denter las duas persunas d’instrucziun funcziunescha aschia ch’ina lavur efficienta ei garantida e survescha al scopo da promover a moda optimala las scolaras ed ils scolars. La nova filosofia dall'intergaziun ei realisada bein en scola primara e scoletta.

Igl emprender in cun ed in da l’auter e la differenziaziun ell’instrucziun ein dependents dallas singulas persunas d’instrucziun. Omisdus aspects ein buca frequents ella scola e possedan in bien potenzial per far in svilup.

contact

Scola Ilanz/Glion
scalem superiur
Dual sura 10
7156 Rueun

telefon 075 434 83 27
telefon secretariat Glion 081 925 28 29

coordinatur local scalem superiur Rueun: Gieri Tschuor

mail coordinatur local: gieri.tschuorglion.educanet2ch