La survigilonza supplementara a Glion vegn purschida mintga di da scola (gentar: caféteria ARGO; survigilonza dil suentermiezdi: stanza 16 el tract B dalla casa da scola a Glion). La mesjamna suentermiezdi vegn el mument buc purschida. Cun minimum 5 annunzias vegn quella puspei introducida.

Affons ord ils vitgs da nossa vischnaunca san medemamein far diever dallas structuras dil di a Glion (meisa da miezdi e survigilonza dil suentermiezdi). Per il transport ein ils geniturs responsabels.

Els loghens da scola Rueun (gliendisdis, mardis, gievgia e venderdis) ed a Ruschein (mardis e gievgia) vegn la meisa da miezdi purschida pils affons che han instrucziun il suentermiezdi e che san buc ir a casa da miezdi. Da quella purschida san era ils affons che habiteschan a Rueun ni Ruschein far diever.

Las annunzias ein ligiontas e valan mintgamai per in quintal (da vacanzas a vacanzas).

Survigilonza duront vacanzas

Per migliurar la cumpatibilitad denter famiglia e lavur ha il cussegl da scola decidiu dad instradar duront treis jamnas da vacanzas (emprema e davosa jamna da vacanzas da stad sco era la secunda jamna da vacanzas d'atun) ina survigilonza pigl entir di. Quei vala per ils affons dalla scoletta entochen la 6avla classa. 

Ulteriuras informaziuns ein d'anflar el reglament da menaschi dallas structuras dil di. Quel vegn cargaus sin la pagina suenter ch’el ei surluvraus.

Ils davos onns ei la scola semidada sin differents camps. Atras la lescha da scola ch'ei ida en vigur igl onn da scola 2013/14 ein differentas purschidas da promoziun vegnidas creadas. Tut quellas purschidas s'orienteschan vid las cumpetenzas che vegnan descretas el plan d'instrucziun21. Sutvart vegnan las singulas purschidas descretas cuortamein. 

Promoziun per affons da lungatg jester
Scolaras e scolars da lungatg jester che capeschan buc ni aunc buc avunda bein il lungatg d'instrucziun, frequentan l'instrucziun da promoziun per affons da lungatg jester. Quel ha liug duront il temps da scola. La finamira dall'instrucziun da promoziun ei da possibilitar als affons da saver suandar l'instrucziun ella classa regulara senza difficultads pli grondas el sectur dil lungatg. Scolaras e scolars che frequentan l'instrucziun da promoziun per affons da lungatg jester obtegnan alla fin dil secund semester in rapport d'emprender.

Promoziun integrada preventiva
Mintga classa vegn sustenida duront ina tochen duas lecziuns ad jamna dad ina pedagoga curativa. Quellas lecziuns gidan da tractar punctualmein difficultads individualas. La promoziun integrativa sco prevenziun ha da principi liug en classa e vegn dabien a tut ils affons.

Promoziun integrada senza adattar las finamiras dall'instrucziun
Quella mesira cumpeglia la promoziun en cass da fleivlezias dalla prestaziun parziala (dislexia, legastenia ni discalculia), talents specials ni difficultads da cumportament. Las scolaras ed ils scolars han las medemas finamiras d'emprender sco la classa. La promoziun integrada senza adattar las finamiras dall'instrucziun ha liug maximalmein duront duas lecziuns ad jamna. Davart lur necessitad decida il scolast da classa e la pedagoga curativa en cunvegnientscha cun ils geniturs.

Scolaras e scolars che absolvan la promoziun integrada senza adattar las finamiras dall'instrucziun obtegnan alla fin dil secund semester in rapport d'emprender.

Promoziun integrada cun adattar las finamiras dall'instrucziun
La promoziun integrada cun adattar las finamiras dall'instrucziun sedrezza a scolaras e scolars che contonschan en in ni plirs roms buc las finamiras d'emprender dalla classa. Quella fuorma da promoziun cumpeglia tut tenor basegns tochen a diesch lecziuns ad jamna. Ils basegns dallas scolaras e dils scolars pertuccai vegnan sclari cun il consentiment dils geniturs dil survetsch psicologic da scola.

Scolaras e scolars che absolvan la promoziun integrada cun adattar las finamiras dall'instrucziun obtegnan alla fin da mintga semester in rapport d'emprender e notas adattadas. La mesira da promoziun en fuorma d'ina promoziun integrada cun adattar las finamiras dall'instrucziun vegn menziunada egl attastat.

Scolaziun speciala integrada
Scolaras e scolars che basegnan en consequenza d'in impediment mesiras da promoziun pretensiusas, vegnan tenor pusseivladad scoladas el liug da domicil e medemamein promovi a moda integrativa. Ils centers da cumpetenza regiunals, en nies cass la Casa Depuoz a Trun, han la responsabladad per scolaras e scolars cun il status d'ina scolaziun speciala integrada.

Ulteriurs posts da consultaziun per damondas en connex cun la promoziun:

survetsch Ortopedagogic dil Grischun
survetsch psicologic da scola dil Grischun
survetsch logopedic Surselva

Tiu talent - Nossa missiun.

La Scola da talents Surselva ei ina purschida da formaziun inviduala per scolar:as talentai sil camp da sport e musica. Ella porscha als giuvenils motivai in bienton dapli che mo uraris adattai al trenament.

Structuras d'accumpignament extendidas, spazi per il svilup persunal, projects specifics per sport e musica, experientschas pedagogicas, in concept medicinal, pusseivladads da sepresentar, luvratoris da sault e teater sco era in agen bus da scola per meglieras colligiaziuns da scola e trenament.

Dapli informaziuns sin www.ts-surselva.ch.

Igl onn da scola 2015/16 ei la lavur sociala vegnida introducida tier la Scola Ilanz/Glion. Quella vegn purschida dalla Casa Depuoz.

Bernhard Meier ei contonschibels per telefon ni mail per scolar:as, geniturs e persunas d'instrucziun.

Datas da contact da: : 079 741 92 25

Damondas? Bu targlinei, telefonei!

Impurtont: Bernhard Meier ei suttamess a l'obligaziun da discreziun e tracta confidenzialmein Vies giavisch.

Tgei ei la lavur sociala da scola?

La lavur sociala da scola ha la finamira d'accumpignar scolar:as el process da lur svilup, da sustener els per ch'els damognien la veta a moda cuntenteivla e da promover lur cumpetenzas che gidan a sligiar problems persunals e/ni socials. Per quels motivs adattescha la lavur sociala da scola las metodas ed ils principis dalla lavur sociala sin il sistem da scola. Ella survescha alla

• prevenziun
• diagnostica ed intervenziun a moda tempriva
• cussegliaziun da scolar:as, persunas d'instrucziun e geniturs
• intervenziuns en classas e gruppas
• intervenziuns en cass da crisas e conflicts
• prestaziuns internas da scola (projects davart differents temas)
• colligiaziuns cun auters survetschs

Concret significhescha quei ch'ella

• promova el process da cussegliaziun il svilup persunal e social da scola:ras
• sustegn ed accumpogna scolar:ass en situaziuns da crisa acutas
• gida ad integrar scolar:as el spazi da viver dalla scola e sustegn els per porscher ad els schanzas d'emprender e da formaziun optimalas
• rinforza la confidonza dils geniturs en lur cumpetenza d'educaziun
• sustegn las persunas d'instrucziun en cass d'ina situaziun sociala difficultusa en lur classa ni cun singulas scolaras e singuls scolars
• integrescha temas socials en scola

Quella purschida che vegn finanziada e sustenida digl Uffeci federal da sport sedrezza a tut ils affons denter 5 e 10 onns.

Differentas uniuns da sport ella regiun meinan atras G&S Kids. La finamira ei da saver dar als affons in'investa en aschi biars geners da sport sco pusseivel per ch’els sappien scuvierer lur preferenzas sportivas persunalas.

Il/la coordinatur/a local/a en Vies liug da scola sa dar dapli informaziuns a tgi che Vus saveis sedrizzar sche Vies affon less prender investa en differents geners da sport.

Ulteriuras informaziuns survegnis Vus directamein digl uffeci federal da sport

"La musica ei il lungatg dalla pissiun" (Richard Wagner 1813-1883) 

Quella pissiun ademplescha la scola Ilanz/Glion aschi savens sco mo pusseivel. Differents projects e presentaziuns a caschun da diversas occurrenzas - naven da musicals entochen cantar dils sogns retgs - cumprovan quella pissiun. Nies pli impurtont partenari en connex cun l'educaziun musicala ei la Scola da musica Surselva. Ha era Vies affon interess d'emprender da sunar in instrument ni prender uras da cant? S'annunziei per plascher directamein tier la "scola da musica Surselva.

Sin la pagina www.bibliotheken-gr.ch/Ilanz/ anfleis Vus il temps d'avertura e la numera da telefon.

Dapli informziuns davart la gruppa da giugs d'affons anfleis Vus sind www.spielgruppe-ilanz.ch.

Entras il project «Cupitgarola» survegn il mintgadi da scoletta slontsch. Persunas d’instrucziun retscheivan sustegn en damondas da moviment e nutriment. Ils affons profiteschan dalla diversitad dallas pusseivladads da moviment e dallas tschaveras sanadeivlas.

Entras differents materials vegn scaffiu cantuns da moviment per sdavalar. Las localitads ein concepidas aschia ch’ellas porschan als affons la pusseivladad da semover libramein. Aschia sviluppeschan els in meglier sentiment corporal. Entras empruar e dumignar finamiras da moviment daventan ils affons pli inschignius, curaschus e sviluppeschan ina pli ferma fidonza en sesez. Nutriment sanadeivel vegn promovius entras pausas e tschaveras sanadeivlas e communablas equilibradas. Ils affons vegnan integrai activamein ella preparaziun da tschaveras ed emprendan aschia d’enconuscher e schazegiar vivonda da basa.

La promoziun da sanadad per scolar:as ei ina gronda finamira da nossa scola. Il program naziunal porscha a scolas primaras in’interessanta purschida sut ils temas moviment, nutriment e fitness pil tschurvi. Seigi quei cuors da cuschinar per classas, dis da moviment, workshops, scolaziuns per persunas d’instrucziun, seras da geniturs, materials da moviment ni tips per l’instrucziun. La purschida vasta ei gratuita e fuorma ina contribuziun custeivla da motivar ils affons a moda plascheivla ad in stil da viver sanadeivel ed en moviment. Ideas da giugs applicablas ed informaziuns impurtontas per in mintgadi sanadeivel retscheveis Vus era cun il « fit4future » input-newsletter: Infos für Eltern - Fit-4-Future - DE (fit-4-future.ch)

La scola ei adina in'investiziun egl avegnir. Quei vala buca mo per scolar:as, mobein era per las persunas d'instrucziun. Ord quei motiv stattan student:as che han la finamira da daventar persunas d'instrucziun fermamein a cor alla scola da Glion.

Ils onns vargai han divers:as persunas d'instrucziun adina puspei dau la pusseivladad a student:as da far lur practicums en lur classas. Ord quei motiv astga la scola da Glion senumnar scola da cooperaziun dalla scola aulta da pedagogia dil Grischun.