maletg empalont - nossa charta
Nossas valurs
Evidenza
organisar
La scola Ilanz/Glion creescha structuras ligiontas che possibiliteschan a tuts d’ademplir cumpetentamein lur incumbensas. Enteifer quellas structuras existan spazis per agens accents.
conviver
Nus communichein a moda aviarta, sincera e beinvulenta.
emprender
La scola Ilanz/Glion ha claras finamiras. Quellas s’orienteschan allas valurs da nossa societad ed era als basegns individuals dils/dallas scolarAs.
Acceptanza
organisar
La qualitad dalla scola Ilanz/Glion viva dall’acceptanza dallas reglas communablas. Quei pretenda loialitad e la habilitad da far cumpromiss.
conviver
La diversitad da tuts cumpigliai en nossa scola vesin nus sco schanza, schi ditg che tuts sustegnan las valurs communablas.
emprender
La scola Ilanz/Glion risguarda las differentas premissas d’emprender. Fermezias vegnan promovidas, vid fleivlezias vegn luvrau. Aschia sus-
tenin nus il svilup persunal da mintgin.
Responsabladad
organisar
Ella scola Ilanz/Glion portan tuts lur responsabladad e contribueschan al reussir da nossa scola.
conviver
Nossa convivenza sebasa sin respect vicendeivel che gida tuts da sesentir bein e saver separticipar a nossa scola.
emprender
Tuts portan la responsabladad pigl emprender. Cun in susteniment persistent promovin nus igl acquist da cumpetenzas ed il svilup dils/dallas scolarAs. Lezs/lezzas surprendan la responsabladad per igl emprender tenor lur habilitads.
Perspectivas
Nus s’engaschein per che nossa scola e tuts cumpigliai sappien sesviluppar cuntinuadamein. Nus respectein ton nossa cultura sco era las midadas sil sectur da formaziun e sociopolitica. Nossa finamira ei da porscher ina purschida da formaziun attractiva e d’aulta qualitad.