Rueun - Pigniu - Siat

liug da scola

Ils affons da Rueun, Siat, Pigniu sco era Andiast e Vuorz frequentan la scola e la scoletta a Rueun. La casa da scola ei vegnida baghegiada igl onn 1915 e renovada levet el decuors dils onns. Quei baghetg ha dau suttetg al scalem primar e superiur tochen igl onn 1998.

 

historia

Aunc avon paucs decennis havevan las 3 vischnauncas Pigniu, Siat e Rueun mintgina si’ atgna scola primara el vitg. Ord munconza d’affons ha Pigniu stuiu serrar la scola igl onn 1973 ed igl onn 2006 era Siat. Ordlunder ha ei lu dau la Corporaziun da scola Pigniu, Rueun, Siat cul liug da scola Rueun.  Tochen oz vegn menau 3 partiziuns primaras ed ina scoletta.

Cugl onn da scola 2010/2011 ei la corporaziun numnada vegnida sligiada si ed ins ha fundau la Corporaziun da scola Rueun e contuorn. A quella appartenevan era las vischnauncas da Vuorz ed Andiast. En quest consorci frequentavan ils affons lur entira carriera da scola a Rueun, essend ch’il scalem superiur era medemanein integraus ella corporaziun.

Entras la fusiun dad Ilanz/Glion ei la Corporaziun da scola Rueun e contuorn vegnida sligiada si. Ina cunvegna da prestaziun reglescha il scolaresser denter las vischnauncas dad Andiast, Vuorz e la vischnaunca Ilanz/Glion.

Las vischnauncas Breil, Vuorz ed Andiast han fusionau cun igl 01.01.2018. Il menaschi da scola vegn ad interim mantenius sco tochen dacheu.

scoletta

La scoletta sco era il scalem primar vegn menaus per romontsch. Las localitads secattan el baghetg plurivalent a Rueun.

Las localitads da zambergiar textil, la halla da gimnastica e la stanza da cant ein medemamein integradas en quei baghetg.

 

classas

Las scolaras ed ils scolars vegnan instruì en classas cumbinadas (1./2., 3./4., 5./6.). Il lungatg d'instrucziun ei romontsch.

Uraris

Cun in klick sin la classa giavischada contonschis Vus mintgamai igl urari elegiu.

scoletta

1. classa

2. classa

3. classa

4. classa

5. classa

6. classa

team
Bundi-Candinas Silvia
mussadra da scoletta
Pfister-Caduff Janine
mussadra da scoletta

Pfister Jacob
scolast da classa 1./2. classa
coordinatur local
Maissen-Vincenz Maria
scolasta da classa 3./4. classa
Venzin Janine
scolasta da classa 3./4. classa
Monn Andrea
scolasta da classa 5./6. classa
Cadalbert-Caduff Manuela
scolasta da lavurs manualas
Coccia Silvana
scolasta dil fatg
Giossi-Caduff Nadia
pedagoga curativa
Brändli Capaul Ursula
pedagoga curativa
Vetsch Sonja
senudar
 
Qualitad da scola
Valetaziun e promoziun 2015 - 2019 (inspectorat da scola)

 

Clima/cultura da scola

Il clima da scola a Rueun ei buns. Ils cumpigliai sesentan bein ed ein cuntents cun la scola.

Las scolaras ed ils scolars van bugen a scola ed indicheschan da vegnir tractai gestamein e curteseivlamein. Quellas indicaziuns vegnan confirmadas entras las datas dalla retscherca tier ils geniturs e tier las persunas d'instrucziun. Cun excepziun d'in tschunavel dils geniturs ein ils pertuccai cuntents cun la scola.

Nus constatein che las persunas d’instrucziun instrueschan fetg bugen, ch'ellas sesentan bein e ch'ellas ein cuntentas cun las cundiziuns da lavur. La cuminonza da scola vegn tgirada independentamein en las duas casas da scola, denton per cuntentientscha dils pertuccai.

Sil camp pedagogic vegnan problems actuals sligiai a moda nuncumplicada e speditiva. Ellas sesidas vegn dau memia pauca peisa al discuors pedagogic per promover e reflectar l'instrucziun communablamein.

Il futur incert dil scalem superiur engreviescha il clima da scola ed absorbescha dabia energia.

Las localitads d'emprender ordeifer las stanzas da scola satisfan mo per part als basegns dall’instrucziun.

 

Instruir/Emprender: Direcziun dalla classa

Nus giudichein la direcziun dalla classa alla scola da Rueun sco buna entochen fetg buna.

Las persunas d’instrucziun meinan bein lur classas e procuran che las reglas da convivenza vegnan respectadas. Ei dat cunvegnas ligiontas per il secuntener en scola e l'instrucziun sespleiga senza disturbis. La gronda maioritad dils geniturs sco era las scolaras ed ils scolars sutlingeschan quei giudicament entras lur opiniun pertuccont il mintgadi en scola.
Ellas lecziuns visitadas ei il temps d’instrucziun vegnius nezegiaus bein per emprender e promover las scolaras ed ils scolars. La punctualitad all'entschatta dall'instrucziun ei buca adina avon maun tier tut las persunas d'instrucziun.

 

Instruir/Emprender: Clima d'instrucziun

La buna relaziun vicendeivla denter las persunas d'instrucziun e las scolaras ed ils scolars ei il fundament per il bien clima d'instrucziun. Ei regia ina buna atmosfera d’emprender.

Las persunas d'instrucziun e las scolaras ed ils scolars van entuorn a moda curteseivla in cun l'auter. Las persunas d'instrucziun procuran ch'ei sappi vegnir luvrau senza tema e cun concentraziun. Ils resultats dalla retscherca tier las scolaras ed ils scolars sco era tier ils geniturs cumprovan quella constataziun.
Nossas observaziuns muossan ch’ei vegn nezegiau sbagls a moda constructiva. Negin vegn blamaus ell’instrucziun, sch’el ni ella fa enzatgei falliu.

 

Instruir/Emprender: Structuras/Evidenza

L’instrucziun ella scola da Rueun ei structurada bein. Las incaricas ein claras e capeivlas. L’orientaziun e l’examinaziun dallas finamiras ein meins sviluppadas.

Las lecziuns visitadas ein stadas ritmisadas e structuradas bein. Per gronda part ei il fil tgietschen ella planisaziun staus vesibels e las activitads, ils cuntegns e las fuormas socialas ein s'accordadas bein. Ils resuns da scolaras e scolars sco era dils geniturs cumprovan quei giudicament. Las persunas d’instrucziun e las scolaras ed ils scolars setegnan bein vid il lungatg d’instrucziun.

Las persunas d’instrucziun persequiteschan per gronda part claras finamiras ell’instrucziun. Quellas vegnan mo per part fatgas transparentas allas scolaras ed als scolars. La retrospectiva sin las finamiras e lur examinaziun han muncau per part.

 

Instruir/Emprender: Activaziun cognitiva

La pratica dall’activaziun cognitiva alla scola da Rueun giudichein nus sco suonda:

Las scolaras ed ils scolars separticipeschan bein all’instrucziun. Las incaricas e las fasas per exercitar e consolidar la materia ell’instrucziun ein sviluppadas bein e da buna qualitad.

Il feedback arisguard il process d'emprender e la reflexiun d’emprender ein buca sviluppai bein e succedan meins frequentamein ell’instrucziun.

Las scolaras ed ils scolars ein separticipai bein ed han luvrau a moda concentrada ell’instrucziun visitada. Igl emprender en atgna responsabladad vegn sustenius entras incaricas aviartas che possibiliteschan allas scolaras ed als scolars da suandar lur agens fastitgs d’emprender en lur agen tempo. L’organisaziun dallas activitads garantescha avunda temps per exercitar e consolidar la materia.
Il feedback dallas persunas d’instrucziun sedrezza savens alla realisaziun dil pensum e dat allas scolaras ed als scolars clars avis correctivs. Feedback arisguard il process d’emprender e feedback dils scolars e dallas scolaras drizzaus alla persuna d’instrucziun vegnan praticai pli pauc ella scola.

Nus renconuschin che ina gronda maioritad dils geniturs attesta alla scola che lur affon empren bia ell’instrucziun e che la scola tracta temas interessants.

 

Instruir/Emprender: Pratica cun heterogenitad

La promoziun speciala dallas scolaras e dils scolars cun basegns specials e la collaboraziun denter la persuna d’instrucziun da classa e la pedagoga curativa ein sviluppadas bein ella scola da Rueun. La differenziaziun ell’instrucziun ed il diever dallas fuormas cooperativas varieschan fetg ellas lecziuns visitadas. En general dat ei basegns d’agir en quei connex.

Ell’instrucziun visitada ei vegniu teniu bein quen dils basegns da scolaras e scolars cun basegns specials e la collaboraziun denter las duas persunas d’instrucziun funcziunescha aschia ch’ina lavur efficienta ei garantida e survescha al scopo da promover a moda optimala las scolaras ed ils scolars. La nova filosofia dall'intergaziun ei realisada bein en scola primara e scoletta.

Igl emprender in cun ed in da l’auter e la differenziaziun ell’instrucziun ein dependents dallas singulas persunas d’instrucziun. Omisdus aspects ein buca frequents ella scola e possedan in bien potenzial per far in svilup.

contact

Scola Ilanz/Glion
Scola primara Rueun
Via da Siat 2
7156 Rueun

telefon 075 434 83 26

Scola Ilanz/Glion
Scoletta Rueun
Via principala 35
7156 Rueun

telefon 075 434 83 25

coordinatur local scoletta/scalem primar Rueun: Jacob Pfister

mail coordinatur local: jacob.pfisterglion.educanet2ch