Glion

liug da scola

Il scalem primar a Glion cun rodund 200 affons secumpona da 9 classas e 4 partiziuns da scoletta.

Dapi igl onn da scola 2008/09 vegn la «scola bilingua» menada cun 3 classas cumbinadas (1./2., 3./4., 5./6.). Era en scoletta vegn la bilinguitad vivida. Ei vegn instruiu en duas partiziuns romontschas e duas tudestgas.

Ils scolars serepartan cun las classas sin dus tracts. Il scalem primar fa diever persuls dil tract C, il tract A vegn partius cun il scalem superiur. 

historia

Las partiziuns dil liug da scola Glion sesanflan en duas casas da scola. Ei dat dus differents models linguistics (la partiziun tudestga e bilingua).

Las scolaras ed ils scolars vegnan da Glion e da Schnaus/Strada.

scoletta

Sco quei ch'igl ei menziunau el sutregister, porscha il liug da scola Glion duas partiziuns linguisticas. Quellas valan secapescha era per la scoletta.

Ils geniturs ston decider denter la scoletta tudestga e romontscha. Sco agid da decisiun meina la scola mintgamai atras ina sera d'informaziun. Ils geniturs pertuccai vegnan envidai entras la scola.

classas

El liug da scola Glion vegnan las partiziuns tudestgas menadas en classas singulas. Ella scola bilingua perencunter vegnan ils affons instrui en classas cumbinadas. Cheutras seresultan 16 partiziuns (incl. las partiziuns da scoletta).

Tier la planisaziun digl urari vegn observau ch'ils affons dallas differentas partiziuns vegnan instrui communablamein en singuls roms (p.ex. religiun, engles, ATT).

Scola bilingua

Il lungatg quotidian dil liug d'instrucziun Glion ei per gronda part il tudestg. Sper il tudestg vegn denton era discurriu romontsch sco era ulteriurs lungatgs. Igl anteriur marcau da Glion valeva sco territori linguistic da cunfin. Sco tal vegn aunc oz instruiu romontsch sco secund lungatg. Naven da l'emprema entochen la sisavla classa primara vegneva e vegn aunc adina instruiu romontsch duront duas lecziuns ad jamna. Per rinforzar las cumpetenzas dil lungatg romontsch, ha il pievel da Glion decidiu igl onn 2005 l'introducziun d'ina partiziun bilingua (scola bilingua). Igl onn 2008 ha l'emprema classa dalla scola bilingua entschiet sia carriera. Dapi lu han ils geniturs dils affons che habiteschan a Glion, Schnaus e Strada la pusseivladad da sedecider per ina u l'autra via linguistica (scola bilingua ni partiziun tudestga).

Cun il contract da fusiun digl onn 2013 ei la scola bilingua vegnida francada ella nova vischnaunca Ilanz/Glion. Il medem temps ei la fasa da pilot dalla scola bilingua ida alla fin. Quella ei vegnida evaluada d'ina gruppa da lavur che consista orda representants dil cussegl scola, persunas d'instrucziun ed in menader da scola. Las conclusiuns da quest'evaluaziun ein stadas la basa per l'elaboraziun dil niev concept da menaschi dalla scola bilingua.

Da tal concept sa vegnir priu investa sut suandont link:

Concept da menaschi dalla scola bilingua Ilanz/Glion

Cun l'introducziun dil plan d'instrucziun 21 ha ei dau midadas ella dotaziun da lecziuns. Quellas midadas ha la scola Ilanz/Glion era stuiu applicar tier la scola bilingua (p.ex. etica, M+I). Cheu anfleis Vus la tabella da lecziuns actuala per la scola bilingua.

CANTALINO e CANTASTICO

Cronica Chor d’affons CANTALINO e CANTASTICO

CANTALINO                 Flavia Walder

CANTASTICO               Flavia Walder e Thomas Cathomen

Commembers:            CANTALINO (3./4. classa) / CANTASTICO (5./6. classa)

Onn da fundaziun:       1998

Ils scolars han giu il giavisch da fundar in chor da scola e cantar leu «cooli und poppigi Lieder». Ei ha duvrau mo entginas pausas da scola da perschuader il scolast Silvio Dietrich da realisar lur idea. Cunquei ch’el era sez in passiunau cantadur e dirigent, ha el adempliu lur giavisch e fundau 1998 il chor d’affons CANTASTICO. Cun agid da siu collega scolast Venanzi Valaulta han las emprovas voluntarias ordeifer igl urari da scola cun rodund 40 affons entschiet. Il plascher da cantar han las cantaduras ed ils cantadurs dil CANTASTICO mussau duront numerusas producziuns. Aschia ha ei p.ex. dau in concert communabel cul chor mischedau Danis/Tavanasa, il chor baselgia Surcuolm ed era in cant aviert cun la Ligia Grischa. Era pils seniors da Glion vegneva ei cantau. Ina specialitad dil dirigent Silvio eran denton las producziuns dils musicals. Leu giugava il CANTASTICO in’impurtonta rolla. Aschia han els mussau denter auter suandonts musicals: «Pinkus Quak», «Mahlzeit» ni «Die Zeitmaschine».

2010 ha Flavia Walder surpriu il chor d’affons CANTASTICO. Suenter in onn ha la dirigenta spartiu il chor ed ha fundau in ulteriur chor che senumna CANTALINO. L’idea da quella separaziun era, da saver scolar las vuschs dils affons specificamein tenor lur vegliadetgna. La tradiziun da cantar musicals ha la dirigenta Flavia manteniu. Sut la bitgetta da Flavia han ils dus chors cantau ils musicals «Toms Traum» e «Tuishi Pamoja“. El CANTASTICO contan uss ils scolars dalla 5./6.classa, ed el CANTALINO ils scolars dalla 3./4.classa. La purschida da cantar sco chor da scola plai als affons, quei semuossa el diember dils cantadurs ch’ei rodund 40 affons per chor. 2015 surdat Flavia Walder il chor CANTASTICO emprem alla scolasta dalla scola billingua Karin Demont, silsuenter al scolast e menader da scola, Marc Pfister e Silvio Dietrich.

Il chor CANTALINO vegn dirigius vinavon da Flavia Walder. Ils dus chors embelleschan differentas occurrenzas da scola cun lur canzuns. Il chor conta denton era el temps liber a caschun da differentas occurenzas, seigi quei per la Märlistadt a Glion, fiastas en baselgia ni autras occurrenzas e festivitads.

DirigentAs dapi 1998:

1998 – 2010, Silvio Dietrich

2010-2015, Flavia Walder CANTALINO e CANTASTICO

2015-2016, Flavia Walder CANTALINO sco era Karin Demont CANTASTICO

2016-2017, Flavia Walder CANTALINO sco era Marc Pfister CANTASTICO

2017-2018, Flavia Walder CANTALINO sco era Marc Pfister e Silvio Dietrich CANTASTICO

2018-2019, Flavia Walder CANTALINO sco era Thomas Cathomen CANTASTICO

team
Kobler Andrea
scoletta partiziun A
Soller Ricarda
scoletta partiziun B
Müller Riccarda
scoletta partiziun C
Caduff Annetta
scoletta partiziun C
Monn Norina
scoletta partiziun D
Lala Madleina
scolasta da classa 1. classa
Pfister Marc
scolast da classa 2. classa
Demont Karin
scolasta da classa 1./2. bilingua
Schlosser Claudio
scolast da classa 3. classa
Spescha Deborah
scolasta da classa 4. classa
Cathomen Thomas
scolast da classa 3./4. bilingua
Valaulta Venanzi
scolast da classa 5. classa
Peng Aldo
scolast da classa 6. classa
Derungs Corina
scolasta da classa 5./6. bilingua
Camenisch Brida
scolasta da lavurs manualas
Candinas Barbara
scolasta dil fatg
Schlosser Anna Maria
scolasta dil fatg
Venzin Janine
scolasta dil fatg
Walder Flavia
scolasta dil fatg
Arpagaus Silvia
pedagoga curativa
Camenisch Regula
pedagoga curativa
Nufer Esther
pedagoga curativa
Tannò Renata
pedagoga curativa
Vetsch Sonja
senudar
Jörger Cornelia
J+S Sportkids
 
 
Qualitad da scola
Valetaziun e promoziun 2015 - 2019 (inspectorat da scola)

 

Rapport clima da scola ed instrucziun

Sustegn da leger

Cuntegn essenzial: Sebasond sin il fundament dalla pretensiun da qualitad correspundenta vegn mintgamai valetau summativ in sectur ni in attribut entras datas trianguladas.

 

Clima/cultura da scola

Il clima da scola dil scalem primar a Glion ei buns tochen fetg buns. El ei caracterisaus entras in ault beinsesentir ed il sustegn vicendeivel enteifer il team da scola.   

Las scolaras ed ils scolars van fetg bugen a scola. Era ils geniturs ein cuntents cun la scola e laudan il grond engaschi dallas persunas d’instrucziun. Las persunas d’instrucziun instrueschan cun grond tschaffen en lur scola e sesentan bein el team da scola. La collaboraziun vegn resentida sco sustegn ed engaschi. Quei semuossa per exempel en las cuminonzas d’emprender professiunalas ed en la collaboraziun denter las pedagogas curativas e las persunas d’instrucziun da classa. Ultra da quei dat ei projects varionts en scola nua che la scoletta vegn denton integrada plitost pauc.

Las persunas d’instrucziun apprezieschan fetg il sustegn  dalla direcziun da scola. Ord vesta dils interrogai ein las localitads ordeifer las stanzas da scola pauc attractivas.

 

Instruir/emprender: Direcziun dalla classa

Nus giudichein la direcziun dalla classa alla scola primara Glion sco fetg buna.

Las persunas d’instrucziun meinan lur classas consequent, e quei cun saver revegnir a process etabli e segirs sco era ad in’organisaziun cun clara finamira. Ellas lecziuns visitadas han rutinas e rituals sco era ina harmonia da tenutas, acziuns e consequenzas influenzau il cumportament dalla classa. Las scolaras ed ils scolars enconuschan las reglas, normas e spetgas e respectan quellas. Quei possibilitescha in luvrar ruasseivel e concentrau e contribuescha che las scolaras ed ils scolars vegnan buc disturbai duront la lavur e san profitar d’ina aulta cumpart da temps da lavur effectiv.

 

Instruir/Emprender: Clima d'instrucziun

L’instrucziun ha liug en in clima d’emprender fetg stimulont ed en in clima da relaziun beinvulent.  

Las scolaras ed ils scolars laudan la moda amicabla e gesta dallas persunas d’instrucziun. Igl emprender succeda en in’atmosfera lucca che sustegn igl emprender. Sbagls nezzegian las persunas d’instrucziun sco schanza da promover il process d’emprender. Ellas lecziuns visitadas havein nus constatau in’atmosfera d’emprender fetg emperneivla e senza tema, quei ch’ei era vegniu affirmau dils pertuccai. 

 

Instruir/Emprender: Structuras/Evidenza

Las lecziuns ella scola primara da Glion ein structuradas bein. Las finamiras ein mo per part transparentas e controlladas.

Las persunas d’instrucziun formuleschan correct e bein capeivel las incaricas el lungatg d’instrucziun. Ina buna ritmisaziun contribuescha bia ad ina structura clara dallas lecziuns e procura per in’instrucziun varionta. En duas tiarzas dallas lecziuns visitadas havein nus viu fetg buns exempels da finamiras d’emprender. En in tierz dallas lecziuns ein las finamiras e spetgas da prestaziun vegnidas explicadas memia pauc transparent. Era in’examinaziun da finamiras sapientiva e raschuneivla, che dat allas scolaras ed als scolars sco era allas persunas d’instrucziun preziusas informaziuns pertuccont il svilup d’emprender, mauncan per part.

 

Instruir/Emprender: Activaziun cognitiva

L’activaziun cognitiva alla scola primara da Glion ei en general buna.

Ei reussescha fetg bein allas persunas d’instrucziun da crear las premissas necessarias per che las scolaras ed ils scolars separticipeschien activamein. Duront l’instrucziun vegn excercitau savens e cun senn. Incumbensas aviartas, pretensiusas sco era mieds d’instrucziun e visualisaziuns motiveschan las scolaras ed ils scolars d’emprender cun success. La pratica da feedback ei etablida different bein ell’instrucziun. Las persunas d’instrucziun dattan savens feedback currigend e specific d’in pensum resp. product. Da l’autra vart retscheivan las scolaras ed ils scolars pli pauc savens ina reacziun specifica da lur agen process d’emprender. En las lecziuns visitadas han las scolaras ed ils scolars mo per part giu la pusseivladad da reflectar sez lur emprender e lavurs. Il feedback dils scolars che duei dar allas persunas d’instrucziun in resun sur da lur instrucziun vegn buc rimnaus sistematicamein.

 

Instruir/Emprender: Pratica cun heterogenitad

La promoziun dallas scolaras e dils scolars cun basegns specials e la collaboraziun denter las persunas d’instrucziun da classa e la pedagoga curativa ein sviluppai bein ella scola primara a Glion. Ellas lecziuns visitadas han ins saviu percorscher differentas praticas da realisaziun cun l’utilisaziun dalla varietad ellas classas e la differenziaziun.

Cun mesiras da promoziun specialas vegn teniu bein quen dallas scolaras e dils scolars cun basegns specials. Sebasau sin cunvegnas funcziunescha la collaboraziun denter persuna d’instrucziun da classa e pedagoga curativa pil pli aschia, ch’in engaschi efficazi dalla persuna d’instrucziun ei garantius.
Ell’instrucziun visitada havein nus entupau plitost paucs pensums da differentas difficultad. Era quei che pertucca il quantum da pensums ni il tempo d’emprender ei vegniu differenziau memia pauc.

Igl emprender in da l’auter ni in cun l’auter dependa tenor nossas observaziuns fetg dalla persuna d’instrucziun. Las fuormas d’emprender classicas cooperativas havein nus entupau plitost pauc ell’instrucziun visitada.

contact

Scola Ilanz/Glion
scola primara
Paradiesgärtli 9
7130 Glion

telefon 081 925 28 29

Scola Ilanz/Glion
scoletta
Schulstrasse 4
7130 Glion

telefon partiziun A 075 434 83 21

telefon partiziun B 075 434 83 22

telefon partiziun C 075 434 83 23

telefon partiziun D 075 434 83 24

coordinatur local scoletta/scalem primar Glion: Marc Pfister

mail coordinatur local: marc.pfister@glion.educanet2.ch